Alameh Rab ibn Hadi el-Medkhali
Burimi: Libri ”Hadithe profetike rreth akides dhe pasimit”
Përktheu: Valdet Gashi
www.perlatmuslimane.com
“E drejta e Allahut mbi robërit e Tij”
Nga Muadh ibn Xhebeli i cili ka thënë: “Teksa isha ulur mbrapa profetit ﷺ në një gomar, ai më tha:
“O Muadh, e di cila është e drejta e Allahut kundrejt njerëzve dhe cila është e drejta e njerëzve tek Allahu?”
I thashë: “Allahu dhe i dërguari i Tij e dinë më së miri.”
Ai ﷺ tha: “E drejta e Allahut kundrejt njerëzve është ta adhurojnë Atë dhe të mos i bëjnë ortak asgjë, kurse e drejta e njerëzve tek Allahu është të mos i dënojë ata që nuk i bëjnë ortak asgjë.”
I thashë: O dërguari i Allahut, a t’i përgëzojë njerëzit?”
I dërguari i Allahut ﷺ tha: “Mos i përgëzo, se pastaj i mbështetën kësaj (mjaftohen me këtë dhe i lënë veprat).”
Transmeton: Bukhari (2856), Muslimi (144), Tirmidhi, Ibn Maxheh dhe Ahmedi.
Transmetuesi i hadithit:
Ai është Muadh ibn Xhebel ibn Amr ibn El-Ensari Auvs El-Khazraxhi, Ebu Abdirr-Rrahman. Sahabiu i njohur, një prej sahabive të dalluar. Ai mori pjesë në betejën e Bedrit dhe betejat e mëvonshme. Ai ishte një burim reference në aspektin e dijes, dispozitave dhe Kuranit. Ai vdiq në vitin 18 hixhri, në Sham në Ta’un Amras (nga kolera).
Kuptimi i përgjithshëm i hadithit:
Profeti ﷺ e bëri të qartë në këtë hadith, qëllimin pse Allahu i krijoi krijesat, e cila është për ta adhuruar vetëm Atë me sinqeritet sepse kjo e drejtë madhështore nuk i takon askujt tjetër pos Tij, Krijuesit të Fuqishëm.
Profeti ﷺ gjithashtu e bëri të qartë se çfarë shpërblimi robi e meriton prej Allahut nëse ai e kryen këtë detyrë madhështore – ”adhurim të sinqertë”, se Ai i kursen ata nga dënimi i zjarrit dhe i fut në xhenet.
Dhe kjo është diçka që e bën besimtarin të lumtur dhe të cilën e mirëpret. Prandaj Muadhi e pyeti profetin për leje dhe tha:
”O i dërguari i Allahut, a t’i përgëzojë njerëzit?”
Por profeti e ndaloi Muadhin nga kjo për të mirën e umetit musliman dhe se ai donte që ata të jenë të zellshëm që të bëjnë vepra të mira dhe të garojnë në atë që i sjell ata më afër Allahut. Që ata me këtë zellshmëri, përpjekje dhe garim të arrijnë nivele më të larta tek Allahu.
Dhe anasjelltas, nëse ata i neglizhojnë veprat e mira dhe mbështeten në premtime të ngjashme ata do të humbasin mirësi të mëdha dhe një shpërblim të madh.
Mësimet që përfitohen nga ky hadith.
1.Urtësia e profetit në edukim kur ai filloi me pyetje në mënyrë që nxënësi ta ketë vëmendjen tek fjalët e tij dhe të kuptojë më mirë.
2.Në hadith shohim modesitnë e profetit dhe karakterin e tij të mirë kur ai hipi mbi një gomar dhe e uli shokun pas tij.
3.Hadithi qartëson të drejtën më madhështore të Allahut mbi robin dhe ky është teuhidi që t’ia dedikosh adhurimin tënd vetëm Atij.
4.Bekimi dhe mëshira e Allahut ndaj robërve me shpërblimin më të mirë për kryerjen e kësaj të drejte.
5.Se është e rekomanduar për t’i dhënë lajmin e mirë muslimanit në lidhje me atë që e bën atë të lumtur.
6.Frika që të mbështetesh vetëm në mëshirën e gjerë dhe të madhe të Allahut sepse kjo mbështetje i dëmton shumë injorantët.